सोलापूर : ‘प्लास्टिकचा वापर करणाऱ्यांना दंड करण्याचा अधिकार शाळांना दिला आहे,’ अशी माहिती जिल्हा परिषदेचे शिक्षणाधिकारी संजय राठोड यांनी फेसबुक लाइव्ह कार्यक्रमात दिली. जिल्हा परिषदेच्या जिल्ह्यातील सुमारे अडीच लाख विद्यार्थ्यांनी या कार्यक्रमाचा लाभ घेतला.
या वेळी जिल्हा परिषदेचे कार्यकारी अधिकारी डॉ. राजेंद्र भारूड यांनी ‘चिमणी पाखरं’ या कार्यक्रमातून विद्यार्थी, शिक्षक व पालकांशी संवाद साधला. शनिवारी (३० जून) सकाळी साडेदहा वाजण्याच्या सुमारास फेसबुकवर डॉ. भारूड व राठोड यांनी पर्यावरण जनजागृती अभियान, प्लास्टिक व थर्माकॉल निर्मूलन, जनजागृती केली. हा कार्यक्रम फेसबुक लाइव्ह करण्यात आला होता. त्यामुळे जिल्ह्यातील शाळेतील विद्यार्थी व पालकांनी हा कार्यक्रम पाहिला.
रोपळे (ता. पंढरपूर) येथील शाळेतही मुलांना हा कार्यक्रम संगणकाच्या मदतीने दाखविण्यात आला. त्यावेळी शिक्षणाधिकारी राठोड यांनी प्लास्टिक वापरकर्त्यांना दंड करण्याचा अधिकार शाळांना दिले असल्याची माहिती दिली. या वेळी त्यांनी ग्रामस्थांच्या मदतीने शाळेच्या इमारतीवर पडणारे पावसाचे पाणी आडवून जमिनीत मुरवण्याच्या सूचना देतानाच प्रत्येक शाळेत परसबागा निर्माण करून विद्यार्थी व शिक्षकांना त्या बागेतील झाडे व वनस्पती जगविण्याचा सल्लाही या वेळी राठोड यांनी दिला.
या प्रसंगी मुलांचे कौतुक करताना तुम्ही फक्त पुस्तके वाचणारे विद्यार्थी नाहीत, तर चांगल्या गोष्टींचे अनुकरण करणारे विद्यार्थी असल्याचे सांगून शिक्षकांना गुणवत्ता वाढीवर भर देण्याच्या सूचनाही शिक्षणाधिकाऱ्यांनी दिल्या. या कार्यक्रमाला शाळेतील सर्व शिक्षक, मुख्याध्यापक सुनील शिंदे, विद्यार्थी आणि पालक उपस्थित होते.